喜歡水族嘅朋友，玩魚玩草玩米蝦大和之後，總有一日會喜歡上水晶蝦，養水晶蝦話易唔易，好多老友，興之所致就買幾隻享屋企，放入魚缸，唔夠兩日就死得七七八八，就算能養到一段時間，但過一兩個月，會遇到脫殼或者壞水問題，終究都會死傷，有見及此，希望提供一個簡短嘅要求比蝦友，幫助大家開始水晶蝦入坑之路 ：
水體：水晶蝦缸最少水體為20L。魚缸 長x闊x高 除 1000就是L 數。
溫度：保持水溫在26度以下，如果屋企有陰涼位置，就可以不用考慮添置水冷。如果室溫較高，可以考慮開冷氣。水冷建議蝦友買壓縮機。電子水冷比較耗電，而且只適合水溫較細嘅缸。
養水：開缸方法有好多種，各施各法，但養水時間就足一個月會穩定好多，隻缸開得好，後面問題少好多，比啲耐性。開得唔好，重新翻缸，時間會更耐。
配件：魚缸，水妖精，氣泵，ADA一代泥，Hagen 礦物質添加劑，TDS筆呢啲都夠。
魚蝦混養：唔建議 ，蝦成長過程中會脫殼，鮮味十足，魚未必忍到口。魚蝦草缸混合，容易發生問題。
造境：石頭盡量避免，要嘅就揀唔會釋放礦物嘅石頭。沉木蝦木可以，先煮走黃水再入缸，一般水榕有機會有農藥，一有就死一堆蝦可免則免。辣椒榕，高手養到，需要一定功力。
燈光：普通T5/T8燈或LED燈都ok，無特定要求 。
水：最好用RO水或蒸餾水，最少都裝番支3M濾芯。水喉水好唔穩定，唔建議 。
有咗上面嘅基本，就可以開始養水晶蝦喇。之後我哋會出其他新手教學，敬請留意，祝大家養蝦快樂 。
Comments