識少少系列 >>> TDS總溶解固體
小編初初入坑玩水晶蝦時，就聽講水晶蝦對水質很有要求，但是又冇人帶路無從入手，於是就請教無所不識的「GOOGLE」大神，上網找了一堆LINK，甚麼 PH，GH，KH，TDS非常學術，曾經打算把當中的科學道理搞明白，後來發現無助將蝦養好，而且越來越亂。最後多番請教各路高手，終於明白眾多參數， 以TDS 最最最為重要的，新水調好TDS，再換水就夠了。
小編希望用簡單D嘅方式講解TDS。首先你去買支TDS筆，淘寶有幾十蚊一支。然後去搵隻杯，裝杯蒸餾水度下，數值係 0。然後你搵D 糖，鹽，加入去，TDS就會上升，加得越多升得越高。由此得知，TDS 講嘅係有幾多固體溶入水中。一般家用水喉水，TDS大概係80左右，意味住自來水本身已含有物質，可能是一些礦物質，或是水務署加左D添加劑，或是經過水管，有其他野溶入水中，這個80的含量，不一定全部都對蝦有用。
小編問過好多養蝦人，一致認同TDS 要在80-120之間，而大部份水晶蝦亦是在這個環境下養出來。值得注意嘅係，蝦房用的水，是從TDS 0 的純水，加配礦物質水調出來，並不是自來水直入蝦缸。大家在蝦房買回來的蝦，自不然最好提供相同嘅水質環境。
想獲得TDS 0 的水，大部份玩家都會配置RO水機或者用蒸餾水。調配TDS的礦物水，一般都會用HAGEN這個牌子，魚街有賣。換水前，先把新水的TDS調好再換水即可。小編試過就咁加HAGEN入缸，失手加多左，導致水震盪，所以建議大家調好再換。個人手法, 一般我會調到100。
最後戴番個頭盔，以上見解係小編嘅經驗心得。有些師兄用自來水養，養得唔錯。小編功力不足，最後都是用RO水加HAGEN，一切才穩定下來。水晶蝦的養法，各師各法。大家可以互相學習，不喜請插。>o<"